تشاو
هالايام عندي رغبة قوية اني احط جهد اني اسمع، عنجد اسمع. لما بسأل سؤال، عنجد اسمع الجواب. التواصل مع الآخرين عم بيصير تحدي كبير عندي (مع الناس بالذات) لانو صرت مش متاكدة اذا في حد بسمع ( ماما دايما بتقلي يا ماما فش حد بسمع، وكنت دايما افكر انو امي بتعاني من هدا الموضوع لانو حكيها قليل). والاستماع من جهة وحدة بعد فترة بيصير ممل و ما لوش معنى. يمكن عم بالجأ للصمت اكتر واكتر. بالمدرسة كانوا دايما يحكو لاهلي “علا شاطرة كتير بس ما بتحكي” أو “لو بتحكي بتصير ممتازة” أو “عندها الجواب بس مخبيتوا” ولكن بالبيت كنت برامة كبيرة ومازلت، حتى يقال اني بدات احكي على عمر سنة ونصف
.عم بدرك بس اليوم اني بحكي لما اكون متاكدة أو شبه متاكدة انو الشخص اللي امامي عم بيسمعني، وبسكت لما بدي احس بمحيطي وافهم
معظم حكينا تعباية فراغ أو قلق من السكوت، خوف، تمضاية وقت، ازعاج، هروب من واقع معين، تكرار لأفكارأو آراء، أو ملغوم بالحكم على الآخرين و مبتعد عن معرفة الذات او تفريغ طاقات بايتة. انا هلق مهتمة بهادا الفراغ أو مساحة السكوت. بحتاج لحظات سكوت اكتر واستماع اكتر. امبارح تممدت على الكنابية على السطح عندي ولفيت حالي بالغطاء وصفنت بالقمر وبكيت. بكيت لاني تعبانة واكتر اشي محتاجيتو هو الصمت
: نبذة عن اللحظات اللي قررت اسكت واسمع، المزرعة يوم الجمعة
10:30 p.m
مرقت سيارة
صرصور: واحد لحاله
هواء
بنت صغيرة
أكتر من صرصور
كلب بنادي وزلمة برد عليه
10:35 p.m
سيارة مرقت
كلب صوته عالي
كمان سيارة
ولاد بنادو بعض
طقطقة أصابعي على الكمبيوتر
10:37 p.m
غراب
صوت زنة
صوت زنة مع صوت الصراصي
10:40 p.m
بيبي بيبكي
الصراصير هاجت
صوت زنة مع الصراصير الهايجة مع مرور سيارة مع صوت اقدام
10:45 p.m
صرصور صولو
10:55 p.m
غرابين
زغرودة طالعة من سيارة
غناء بدوي بصوت نسائي
غناء بدوي بصوت رجل تخلله صوت الكلب واطفال بتصرخ و الصرصور
6:30 a.m
صوت المضخة
المضخة فاقت
6:48 a.m
ماء سائل من السطح
ديك بحكي مع ديك
7:17 a.m
جاجات كأنهم بمظاهرة
النخلة مع هواء
بومة مع عصفور
11:10 am
شاكوش بطرطق
شجر بلعب
2:22 p.m
هواء قوي
جرس
عصافير
مرقت شاحنة
